Por que as conferencias do Estado do Mapa son tan importantes para OSM

Se tiveches a sorte de asistir a unha conferencia sobre o Estado do Mapa (State of the Map, ou SotM, polas súas siglas en inglés), xa sabes que ofrecen algúns dos mellores coñecementos, habilidades e formación de SIX e xeoespaciais dispoñibles, ademais de ser un evento de networking fantástico con moito tempo social divertido e atractivo. Se acabas de chegar á comunidade de OpenStreetMap e aínda non asistiches a un SotM ou formas parte dunha empresa que está pensando en patrocinar un SotM, ademais de poder enviar un grupo como asistentes, esta publicación é para ti.

Crédito da imaxe: Parker Michels-Boyce Photography. Etiqueta a @OpenStreetMapUS nas publicacións que fagas en redes sociais ó usar as fotos.

Que é un SotM?

OSM organiza reunións anuais sobre o Estado do Mapa como unha forma de construír comunidade, compartir ferramentas e investigacións e establecer redes entre a comunidade co obxectivo de mellorar o mapa. Hainos de todos os tamaños e organízanse a nivel local, rexional e global, pero o obxectivo é sempre o mesmo: reunirse para falar de investigacións, ferramentas, iniciativas e outros temas comunitarios sobre a elaboración de mapas. Os SotM locais e rexionais están organizados polas comunidades locais e o SotM global está organizado pola Fundación OSM. 

As conferencias do Estado do Mapa constrúen pontes entre as e os cartografadores de OSM e os activistas comunitarios, as desenvolvedoras de código aberto, o persoal investigador de universidades e institucións académicas, deseñadores, cartógrafas, así como profesionais da tecnoloxía de empresas privadas e institucións públicas.

Que tipos de temas se tratan?

A gama de temas é tan diversa como a comunidade. Os tipos de presentacións van desde “charlas lóstrego” de 5 minutos ou presentacións de 15-20 minutos ata obradoiros de 75 minutos. Abarca temas como o desenvolvemento de plataformas e ferramentas, a análise de datos, a cartografía humanitaria e moitos outros. As persoas que presentan están afiliadas a comunidades locais, a Youthmappers, a HOTOSM, a maplibre, a FOSS4G, á academia ou a outras organizacións sen ánimo de lucro e pequenas e grandes empresas.

O SotM global de 2022 de Florencia, Italia, ofrece un bo exemplo da gama de información e habilidades que están representadas nun SotM. Aquí tes só algúns dos títulos daquelas sesións: “OSM Carto como teselas Vector: innovando en conxuntos de datos derivados de OpenStreetMap”, “Cartografando unha pequena cidade”,  “maplibre-rs: representación de mapas multiplataforma usando Rust”, “Dez anos de iD Editor: o camiño por diante” ou “O liderado das mulleres no mapeo de comunidades ribereñas da selva amazónica empregando OSM”.

Estes exemplos apenas raspan a superficie.  Aquí tes o programa completo e aquí as gravacións das presentacións. Aquí está tamén a exposición de carteis: si, incluso as paredes do SotM de 2022 eran educativas. E aquí tedes un resumo do expediente académico.

Entón, como podes ver, un SotM ofrece inspiración e coñecemento para quen teña interese no futuro da tecnoloxía xeoespacial, OpenStreetmap e software e datos de código aberto e gratuíto.

A comunidade OpenStreetMap pasa os 365 días do ano construíndo xuntos o mellor mapa do mundo. O Estado do Mapa dos EUA é a oportunidade de pasar uns días, en persoa, construíndo a mellor comunidade. O evento é único en xeo, xa que atrae tanta diversidade de temas e asistentes. A industria privada, as persoas afeccionadas de forma individual, a academia e mesmo o goberno únense para conectarse, innovar e aprender do resto.

 
 –Maggie Cawley, directora executiva, OSM-EUA

Por que é importante patrocinar conferencias sobre o Estado do Mapa?

Hai moitas boas razóns!

  • A experiencia compartida en todos os SotM contribúe directamente á calidade de OpenStreetMap.
  • É o correcto; as empresas que se benefician de OSM deberían apoiar a comunidade e atribuír os datos.  As doazóns ó proxecto a través da OSMF, o patrocinio de SotMs, a converterse nun membro corporativo e o intercambio de ferramentas e datos son boas formas de devolver.
  • É unha excelente oportunidade de contratación. Onde máis podes atopar moitas das mellores mentes en SIX e xeoespaciais nun só lugar?
  • É unha excelente oportunidade de desenvolvemento profesional. Conectarás con outras empresas que traballan en OSM, aprenderás doutras enxeñeiras e analistas e inspirarás decenas de novas ferramentas e proxectos interesantes.
  • Desenvolve a conciencia da marca a través da responsabilidade social corporativa. É ben sabido que os clientes son máis fieis ás empresas que invisten en crear un mundo mellor.
SotM Asia
SotM Francia
SotM EUA | Crédito da foto: Parker Michels-Boyce Photography .
2022 SotM
SotM África | Crédito da foto: publicación do blog de Yusuf Suleiman

Hai demasiados SotM para representalos todos aquí, pero aquí tes algúns exemplos recentes.

Como podo apoiar un SotM en 2023?

Hai catro grandes SotM rexionais que están por chegar e todos eles necesitan patrocinadores.

FOSS4G Oceanía
Aukland, 16-20 de outubro de 2023: folleto de patrocinio

Esta conferencia fusiona FOSS4G e SotM nunha soa conferencia para centrar os esforzos xeoespaciais de código aberto de Oceanía. A conferencia ofrece ás persoas que mapean en Oceanía unha ligazón a comunidades globais de desenvolvedoras e usuarios e conta co apoio de OSGeo e da Fundación OpenStreetMap. As conferencias anteriores de FOSS4G SotM Oceania en Melbourne, Wellington e Suva foron un éxito rotundo:

  • Melbourne e Wellington esgotáronse con máis de 250 asistentes en cada conferencia
  • Asistentes de máis de 14 países de Oceanía e mesmo de Canadá, Reino Unido ou Estados Unidos
  • Os asistentes incluían profesionais de GIS, desenvolvedoras, afeccionados, persoal que traballa no sector humanitario ou axencias gobernamentais

Estado do Mapa UE
Amberes, 10-12 de novembro de 2023: folleto de patrocinio

Esta conferencia ofrece unha oportunidade para que un grupo diverso de persoas se reúnan e intercambien coñecementos, experiencias e plans para desenvolver o uso e mellora de OSM. Espérase que participen preto de 400 asistentes de Europa e de todo o mundo. A conferencia ofrecerase como un evento híbrido, o que permitirá que participantes adicionais se unan a través da transmisión en directo se non poden unirse presencialmente.

“State of the Map é o lugar onde estás máis preto de sentir o latexo de todo o proxecto. O SotM internacional pode e debe viaxar polo mundo! Pero hai demasiados cartógrafos e usuarios de datos en Europa para que non haxa unha gran conferencia OpenStreetMap en Europa durante dous anos”.

–Joost Schouppe, OSM Bélxica, co-organizador de SotM EU 2023

Estado do Mapa Asia
Bangkok, 21-25 de novembro de 2023: folleto de patrocinio 

Despois dun regreso exitoso o ano pasado en Filipinas, SotM Asia celébrarase este ano en Bangkok, Tailandia. Esperamos reunir entre 300 e 500 participantes de Asia e de fóra para conectarse e discutir non só OpenStreetMap e ferramentas, proxectos e desafíos de datos abertos, senón tamén mostrar as diversas culturas asiáticas.

Estado do Mapa África 
Camerún, 1-3 de decembro de 2023: folleto de patrocinio

OSM Africa é unha comunidade rexional de colaboradoras, usuarios e seguidores de OpenStreetMap de países do continente africano. Isto inclúe cartógrafos, investigadoras científicas ou humanitarias, ONG, axencias gobernamentais, pequenas empresas e tamén outras globais que realizan e/ou apoian traballos no continente. A rede ten como obxectivo facer crecer e producir un mapa completo e ben detallado de África en OpenStreetMap para avanzar na calidade, integridade e sustentabilidade dos datos xeoespaciais en África.

A publicación orixinal en inglés foi escrita por Courtney Williamson.

Convocatoria de voluntariado con habilidades de deseño e arte

Es unha persoa boa no deseño gráfico? Gústache debuxar, pintar ou facer fotografías? Debuxas cómics ou estás a crear unha novela gráfica no teu tempo libre? Tes formación en visualización de datos, tipografía e teoría da cor? Es esa persoa que garabatea no dorso de anacos de papel mentres as outras están a falar?

O Grupo de traballo de Comunicación (CWG, polas súas siglas en inglés) precisa de ti!

Buscamos engadir máis voluntarios ao CWG que nos axuden a engadir narracións visuais ao blog, ás redes sociais e a outras canles para apoiar os eventos de OSM, a recadación de fondos, os proxectos de desenvolvedores e outros proxectos.

O teu compromiso de tempo pode ser tan pouco como unhas poucas horas nun proxecto ata unha ou dúas horas á semana nun proxecto durante os próximos meses. É unha elección túa.

Envía un correo electrónico a communication@osmfoundation.org co asunto “Visual Storytelling Team” e indícanos un pouco sobre cal é o teu interese, incluíndo calquera ligazón ao teu traballo que queiras compartir. Unha vez que teñamos unha idea de quen está interesado e que tipo de habilidades están dispoñibles, estableceremos unha lista de proxectos e un proceso para compartir solicitudes.

Pronto teremos moitos máis detalles!

A publicación orixinal en inglés foi escrita por Courtney Williamson.

Comezamos 2023 no Consello da OSMF

En xaneiro, a nova directiva da OSMF reuniuse para discutir as actuacións que cada compoñente quere impulsar en 2023. O que xurdiu foi unha axenda inicial de traballo para este ano, cunha boa distribución en todas as áreas. Embaixo amósanse algunhas frases directamente de cada unha das compoñentes sobre o que estamos pensando e como e onde queremos contribuír en 2023.

Agradecemos a vosa aportación e participación. Contacta connosco directamente  ou, se es unha persoa membro da OSMF, únete á reunión mensual do Consello. Seguiremos desenvolvendo e perfeccionando as nosas ideas, e teremos unha reunión virtual proximamente.

Mikel:

A recadación de fondos é a miña principal prioridade, apoiar o noso persoal básico e a infraestrutura de forma sostible. Teremos campañas de recadación de fondos en fontes diversificadas, incluíndo pequenos doadores comunitarios, subvencións públicas e privadas e compromisos do sector corporativo. En segundo lugar, centrareime en facer da OSMF un excelente lugar para traballar, seguir implementando os procesos e as estruturas necesarias e apoiándoos para que teñan éxito. Finalmente, como secretario, quero darlle á OSMF un ton de comunicación profesional e receptivo. Canto máis penso niso, máis creo que a excelente comunicación é a clave para tanto: a través da captación de fondos, a creación de reputación e o crecemento da comunidade.

Sara:

Gustaríame centrar este ano en facer que as operacións diarias da OSMF funcionen con máis fluidez, para que o Consello teña máis tempo no futuro para centrarse en asuntos estratéxicos. Isto inclúe unha planificación e un orzamento anuais, comunicacións sen problemas para e desde o Consello e un plan financeiro onde a maioría dos nosos custos operativos se cubran mediante ingresos regulares. Tamén espero obter algo de sabedoría dos nosos grupos de traballo para entender como podemos axudarnos mutuamente para difundir o traballo de forma máis eficiente e con máis ombros.

Guillaume:

  • trasladando o noso rexistro corporativo á UE
  • mellorando a comunicación
  • facilitar melloras de procesos para o etiquetado OSM, como a democracia líquida
  • planificación financeira e orzamento
  • aumentar a diversidade de fontes de captación de fondos
  • con Grant, incrementar a fiabilidade da infraestrutura

Arnalie:

Durante o meu primeiro ano no consello de Consello da OSMF, gustaríame centrarme en:

  • Constituír máis seccións locais
  • Diversificar a pertenza da OSMF, incluíndo os grupos de traballo da OSMF
  • Garantir a sustentabilidade financeira e a captación de fondos eficaz (un aspecto que do que teño que aprender máis e desenvolver persoalmente)

Roland:

Para min, a recadación de fondos é o máis importante que hai que facer agora mesmo. Necesitamos cartos tanto para as melloras tan esperadas como para as operacións diarias, e as nosas fontes tradicionais de ingresos dos membros individuais e corporativos nin sequera cobren as nosas operacións diarias. Ao mesmo tempo, o anuncio de Overture deixou claro que algúns consumidores de datos están dispostos a gastar cartos en datos de mapas fiables. Polo tanto, un elemento básico é axustar os niveis de adhesión corporativa.

Outro aspecto é recadar cartos para proxectos de mellora e mesmo proxectos completamente novos. A historia demostrou que é máis factible conseguir ingresos para ideas concretas que para un fondo abstracto. Mentres o Consello traballe en nome da comunidade, escoitarei as aportacións sobre os proxectos existentes e discutiremos as ideas de novos proxectos que sexan o suficientemente concretos para estimar os custos e ter así unha lista de posibilidades para entusiasmar a quen queira doar. Non espero que todos os proxectos sexan financiados, pero si quero ver todas as oportunidades de financiamento potencial atopando un proxecto impactante no que se poida investir.

Craig:

Agora, neste mes, estou a facer algo de forza coas miñas   promesas electorais .

Quero axudar a OSMF a construír a comunidade de cartografía e apoiar e animar aos líderes comunitarios existentes. O meu esforzo especial estará en África.

Estou ansioso por priorizar o programa de diversidade e inclusión da OSMF. Teño algunhas ideas, pero isto hai que facelo como un esforzo colectivo.

En materia de tecnoloxía, gustaríame apoiar a OSMF para documentar as súas operacións informáticas, actualizar e mellorar o software, ver as estruturas de datos, promover mosaicos de mapas vectoriais e manter o hardware actualizado e fiable.

Tamén estou a facer un esforzo para apoiar a administración dun xeito profesional, centrado na planificación estratéxica, o orzamento, a captación de fondos e as comunicacións.

Mateusz:

Para comezar, é necesario manter as cousas básicas funcionando. Isto aplica á comunidade OSM, aos servidores e ao software crítico. Temos a esperanza en que nestes ámbitos só fagan falta actividades rutineiras.

Estou a traballar nun resumo orzamentario lexible por humanos, necesario para o traballo do Consello de OSMF, unha mellor transparencia e para as persoas interesadas no que realmente está a facer a OSMF, especialmente quen potencialmente poida doar.

O manexo do RXPD está atrapado no limbo e é responsabilidade do Consello de OSMF organizar o manexo desta molesta tarefa.

Por último, quero tomar medidas para facer cumprir os requisitos de atribución.

Coñece o novo Consello da OSMF

En decembro de 2022, catro novas persoas foron elixidas para o Consello da Fundación OpenStreetMap, que complementan as tres que xa prestaban servizo. Estas persoas son Arnalie Vicario, Craig Allan, Mateusz Konieczny e Sarah Hoffmann e únense a Guillaume Rischard, Mikel Maron e Roland Olbricht.

No que respecta ás ambicións de diversidade da OSMF, este colectivo de membros da Xunta é ilusionante por dúas razóns: En primeiro lugar, porque esta é só a segunda vez que o Consello da OSMF conta con múltiples membros femininos e, en segundo lugar, porque esta é a xunta con máis diversidade xeográfica que vimos ao ter representación de catro continentes.

Entón, imos coñecer o Consello de 2023:

Arnalie Vicario (Filipinas)

Arnalie é de Filipinas e cartografa baixo o nome de usuario arnalielsewhere. Defende os datos abertos e é unha apaixonada da construción de espazos inclusivos na comunidade da cartografía aberta. Foi especialista en SIX durante sete anos ata que asumiu o compromiso comunitario (en liña) en 2020. Traballa como responsable de participación na comunidade en liña no Equipo humanitario de OpenStreetMap (HOT, polas súas siglas en inglés) e como nai a tempo completo.

É colaboradora de OpenStreetMap desde 2016, o mesmo ano en que se uniu e pasou a formar parte da comunidade OSM en Filipinas. En 2018, coñeceu á súa parella na conferencia do Estado do Mapa de Milán e volveu reunir o grupo GeoLadies Philippines, unha agrupación de defensa da diversidade comunitaria, a participación colaborativa e os espazos afirmativos, especialmente para mulleres, xunto con outras comunidades pouco representadas en OpenStreetMap. É partidaria e aliada de varias comunidades e redes como Geochicas, Women+ in Geo, Open Heroines e moitas máis.

Podes obter máis información das súas opinións sobre a comunidade en OpenStreeMap e sobre a cartografía aberta humanitaria na Entrevista de podcast de Geomob – Arnalie Vicario: Construíndo espazos inclusivos en OSM, así como a través dos seus diarios OSM.

Craig Allan (Sudáfrica)

Craig procede dun goberno local onde, como planificador espacial, recibiu formación formal en interpretación de fotografías aéreas, fotogrametría e topografía. Utilizou sistemas SIX comerciais desde os anos 80. Comezou polo sinxelo pero moi efectivo Atlas GIS de Strategic Mapping Inc. e pasou máis tarde ao exasperante pero eficaz ARC/INFO de ESRI. Agora é un fan de QGIS e utilízao para apoiar o traballo filantrópico na Rangpur Division de Bangladesh.

Craig céntrase na cartografía en África baixo o nome de usuario cRaIgalLAn. Aprecia poñer unha aldea no mapa xa que isto pode permitir que se coñezan as persoas que alí viven e así reciban apoio ao desenvolvemento e axuda humanitaria. Craig tamén está moi interesado na conservación e no cambio climático, así que fai moita cartografía de bosques ameazados na República Democrática do Congo e de varios lugares de Kenia, incluíndo a reserva de Mara e os bosques e zonas húmidas do interior da cidade de Lamu. Tamén realiza mapas no norte de Chad porque lle interesan tanto os arcos rochosos como os bosques xéricos montanos do Sáhara Oriental que, dalgún xeito, sobreviven nas altas montañas do Sáhara.

Na súa vida laboral posterior, fixo menos xeografía e demografía e máis xestión, incluíndo planificación estratéxica, xestión de riscos, xestión do rendemento, orzamentos e tarefas administrativas. Estas habilidades e experiencias para construír e xestionar organizacións agora emprégaas no interese da Fundación OSM e para crear unha comunidade OSM máis ampla.

Guillaume Rischard (Luxemburgo)

Guillaume Rischard é de Luxemburgo e mapea como Stereo, que é máis fácil de pronunciar (tamén é o seu nome de usuario no wiki). Cando descubriu OpenStreetMap en 2008, só se amosaban algunhas estradas principais ao seu redor. Non tomou o proxecto en serio. En 2011, topouse de novo con nós e viu que o mapa se fixera moito máis preciso. Detectou un nome que faltaba, e cando o viu no mapa cando se actualizou xusto despois de gardalo, quedou enganchado. Cando carga un conxunto de cambios, gústalle abrir ese lugar no seu navegador mentres aínda non se renderiza, e a mesma URL nunha nova pestana uns segundos despois e cambiar entre elas.

Traballa como consultor de datos autónomo e foi o responsable técnico que axudou a impulsar a estratexia do Portal de datos abertos de Luxemburgo, onde conseguiu que se publicaran os enderezos, as ortoimaxes e os datos de mapas oficiais de Luxemburgo.

O máis significativo que escribiu recentemente é o informe do Grupo de traballo de membros sobre as 100 inscricións sospeitosas. Guillaume e o coautor Steve Friedl tiveron oa honra de recibir o premio OpenStreetMap pola súa influencia na conferencia do Estado do Mapa en Heidelberg.

É membro do Grupo de traballo de datos, do Grupo de traballo de membros e ocasionalmente colabora co Semanal OSM .

Mateusz Konieczny (Polonia)

Mateusz cartografa e edita a wiki co seu propio nome. Centra o seu mapeo na topografía local, pero tamén fixo algunhas edicións de bots e edicións remotas. Tamén contribuíu a StreetComplete e outras ferramentas relacionadas con OSM, como os presets de iD e JOSM. Concéntrase moito tempo en contribuír ao wiki de OpenStreetMap, especialmente en documentar esquemas de etiquetado e revisar os ficheiros cargados para asegurarse de que teñen a información de dereitos de copia correctamente engadida.

Mateusz quere contribuír a unha maior transparencia, atribución e cumprimento do RXPD mentres estea no Consello.

Mikel Maron (EUA)

Mikel Maron é un programador e xeógrafo que traballa no usos de impacto comunitario e humanitario do código e os datos abertos. Comezou con OSM en 2005. Foi elixido para o Consello da OSMF en 2015, e anteriormente tamén de 2007 a 2012. Actualmente traballa en The Earth Genome, como xefe de produtos dixitais. No pasado dirixiu o equipo da comunidade en Mapbox. É cofundador do Grupo humanitario de OpenStreetMap, da GroundTruth Initiative e do proxecto Map Kibera . Viaxou moito, organizando proxectos de cartografía na India, Palestina, Exipto, Suazilandia, entre outros.

Mapea baixo mikelmaron e contribúe ao wiki baixo Mikel .

Roland Olbricht (Alemaña)

Roland Olbricht chegou a OSM en 2008. Desde 2011 mantén e opera a API Overpass independentemente do seu traballo diario. Antes da Covid participou en varias reunións locais en Alemaña. Colabora no wiki de OSM co nome de usuario Roland.olbricht .

Na súa vida profesional, Roland fai software para o transporte público como desenvolvedor de software para a empresa MENTZ GmbH .

Sarah Hoffmann (Alemaña)

Sarah Hoffmann leva contribuíndo a OpenStreetMap desde 2008 co nome de usuario lonvia (e colabora no wiki co mesmo nome).

Comezou como unha simple mapeadora, recollendo moitos datos mentres facía sendeirismo polos Alpes suízos. Co paso dos anos involucrouse cada vez máis no desenvolvemento de software para OSM. É mantedora de Nominatim , osm2pgsql , waymarkedtrails.org e outros dous proxectos. Forma parte do equipo de administración do sistema da OSMF, onde é responsable dos servidores de Nominatim e axuda no comité de programas do Estado do Mapa os últimos dous anos.

En 2020 finalmente renunciou a finxir que OSM é só un pasatempo. Actualmente traballa como freelance facendo desenvolvemento e consultoría de software OSM en xeral e de Nominatim en particular. Vive en Dresden , Alemaña.

A Fundación OpenStreetMap é unha organización sen ánimo de lucro, creada para apoiar o proxecto OpenStreetMap. Dedícase a fomentar o crecemento, desenvolvemento e distribución de datos xeoespaciais gratuítos para que calquera poida usar e compartir. A Fundación OpenStreetMap posúe e mantén a infraestrutura do proxecto OpenStreetMap, recibe o apoio financeiro das cotas de persoas asociadas e das doazóns e organiza a conferencia internacional anual sobre o Estado do mapa . Os nosos grupos de traballo voluntarios e un reducido persoal traballan para apoiar o proxecto OpenStreetMap. Únete á Fundación OpenStreetMap por só 18 € ao ano ou de balde se colaboras activamente en OpenStreetMap.

Recordatorio: petición de comentarios sobre o modelo de datos

Estudo de modelos de datos

O grupo de traballo de enxeñería da Fundación OpenStreetMap encargou a principios de 2022 un estudo sobre como mellorar o modelo de datos existente. Jochen Topf presentou os resultados deste estudo, incluíndo recomendacións sobre como facer que o modelo de datos OpenStreetMap sexa máis eficiente computacionalmente e máis accesible.

Fixéronse dúas suxestións fundamentais:

  • introducir un tipo de datos de área para representar polígonos
  • desfacerse dos nodos sen etiquetar

Consulta á comunidade

Para decidir os seguintes pasos deste proceso queremos ter máis discusións coa comunidade de desenvolvedores e desenvolvedoras xa que os cambios propostos afectan ao software de OpenStreetMap que depende directa ou indirectamente do modelo de datos.

Únete á discusión

Beneficios potenciais

Menos desorde para as áreas

Algúns cartógrafos poden sorprenderse ao saber que OSM aínda non ten un tipo de datos de área. Despois de todo, o editor iD presenta botóns destacados para debuxar puntos, liñas e áreas. Unha vez cartografadas, estas áreas adoitan aparecer no mapa como se esperaba. A wiki de OSM documenta se unha etiqueta adoita usarse en áreas, e mesmo Overpass Turbo permítelle usar áreas na súa consulta.

Entre bastidores, porén, estas áreas represéntanse como formas ou relacións. Cada ferramenta que traballa con datos OSM usa o seu propio conxunto de regras para adiviñar se un determinado xeito representa unha liña ou unha área. Facer que as áreas sexan parte adecuada do modelo de datos OSM levaría a unha interpretación coherente entre as aplicacións, permitiría que a API evite que se carguen áreas rotas e, eventualmente, pode levar a compatibilidade con descargas parciais de áreas moi grandes.

Manter o procesamento OSM accesible

Actualmente, os camiños están compostos por referencias a nós, e confiamos nestas referencias para determinar como se conectan entre si. Resolver as coordenadas destas referencias de nodos é un proceso custoso dentro da cadea de ferramentas de OpenStreetMap xa que leva horas ou días, mesmo en hardware capaz.

No futuro, podemos modelar formas como unha simple lista de coordenadas, dependendo da implementación exacta coa que acabemos. Isto ofrecería grandes beneficios de rendemento, pero desfacerse dos nodos sen etiquetas sería un cambio significativo.

A primeira vista, as melloras de rendemento poden non parecer especialmente interesantes. Pero o fácil que é traballar cos nosos datos incide directamente no útil que é OpenStreetMap para o mundo en xeral. Como observa Jochen: “O obxectivo é manter a OSM como ese gran recurso que pode ser utilizado non só por empresas multimillonarias senón tamén por un estudante que quere crear un mapa do mundo no seu caderno ou unha activista cunha modesta computadora de segunda man”.

Un mellor histórico para OSM

Moitos cartógrafos quedan decepcionados cando se dan conta das poucas cousas que pode mostrar a pestana do histórico do sitio web. Hai moitas ferramentas, como OSMCha e Achavi, que ofrecen moito máis, pero aínda requiren un certo grao de competencia para usalas.

Podes preguntar por que, e a resposta é moi técnica: a localización dunha única versión dun camiño, en moitos casos, non está definida. É a razón pola que o seguimento de cambios seguía sendo unha disciplina experta con ferramentas relativamente pouco amigables para quen recén chega. Ao cambiar o modelo de datos afastarémonos desa barreira e, posteriormente, podemos esperar ferramentas substancialmente mellores, pero non antes de obter as coordenadas e versións adecuadas para as formas.

Xeración de mosaicos vectoriales

Aínda que hai un gran número de xeradores de mosaicos vectoriais maduros hoxe en día, aínda temos un par de problemas.

  • Un deles é cales son as características que se incluirán nos mosaicos vectoriais de openstreetmap.org
  • A outra é como conciliar actualizacións minuciosas con mosaicos vectoriais para un rendemento a un nivel aceptable.

Esa tarefa faise unha orde de magnitude máis fácil se non só podes paralelizar realmente a xeración de mosaicos, senón tamén elidir o primeiro e custoso paso para descubrir a que mosaico pertence un camiño modificado.

Quizais poidamos atopar alguén que encapsule a potencia informática bruta necesaria para facelo. Pero aínda que sexa así, isto sería un grao de dependencia non moi desexable con esa persoa.

Entón, os mosaicos vectoriais para openstreetmap.org son en principio posibles sen este cambio de modelo de datos, pero a un custo moito maior que só o hardware especializado poderá manter ao día con todos os minuciosos cambios.

Dá a túa opinión sobre o futuro

Algún tipo de cambio é inevitable. O crecemento da base de datos OSM está a superar as melloras de velocidade no hardware, e o modelo baseado en ID significa que non se pode paralelizar todo o proceso coa aceleración total. No pasado era posible manterse ao día dos cambios, pero agora necesita máis e máis trucos. Hai un punto no futuro no que tamén o hardware especializado será suficiente para manterse ao día dos minuciosos cambios.

Non obstante, hai moitos enfoques posibles para afrontar este desafío. Agora é a oportunidade para que a comunidade de desenvolvedores e desenvolvedoras compartan a súa opinión sobre o camiño a seguir.

A Fundación OpenStreetMap é unha organización sen ánimo de lucro, creada para apoiar o proxecto OpenStreetMap. Adícase a fomentar o crecemento, o desenvolvemento e a distribución de datos xeoespaciais de balde para que calquera poida empregalos e compartilos. A Fundación OpenStreetMap posúe e mantén a infraestrutura do proxecto OpenStreetMap, recibe o apoio financeiro das cotas das persoas socias e das doazóns e organiza a conferencia internacional anual sobre o Estado do mapa . Os nosos grupos de traballo voluntarios e un reducido persoal traballan para apoiar o proxecto OpenStreetMap. Únete á Fundación OpenStreetMap por só 18 € ao ano ou de balde se colaboras activamente en OpenStreetMap.

Visión da Fundación OpenStreetMap sobre o lanzamento de Overture

O lanzamento da Fundación Overture Maps  é un desenvolvemento significativo no mundo dos datos abertos de mapas. Quen fundou Overture son líderes influentes da industria tecnolóxica e comprometeron moitos recursos. Aínda que moitos detalles de Overture seguen sen estar claros, a Fundación OpenStreetMap está interesada en comprender mellor o proxecto. No mellor escenario, OpenStreetMap beneficiaríase dos avances de Overture no desenvolvemento de software, dos datos e do financiamento. Non obstante, tamén recoñecemos os riscos e seguiremos desenvolvendo a nosa capacidade para facer medrar a comunidade e financiar a nosa infraestrutura e o desenvolvemento futuro.

Os datos de OpenStreetMap están dispoñibles para que os utilice calquera, desde creadores e creadoras de mapas afeccionados ata corporacións globais, e animamos a Overture a que faga o mesmo, seguindo as expectativas da nosa comunidade e os termos de licenza. Os problemas técnicos que aborda Overture, como os controis de calidade, a integración de datos e o aliñamento dos esquemas, son valiosos para calquera provedor de datos de mapas. Sabemos que os consumidores de datos estiveron traballando illados nestes desafíos durante demasiado tempo e, ao sacar estes problemas ao ámbito común e as ferramentas de fonte aberta, todos podemos beneficiarnos.

Despois do anuncio, tivemos conversacións informais con algunhas persoas implicadas en Overture para facer preguntas e aprender máis. En particular, preguntamos sobre como se solapa o traballo de Overture co de OpenStreetMap e cal será a futura participación das empresas membros en OpenStreetMap. As respostas foron útiles, aínda que quedan moitas preguntas. Animamos a Overture a interactuar coa nosa comunidade e a compartir os seus plans publicamente. Compartiremos aquí algúns puntos que foron discutidos de xeito informal.

Sempre que se falou se fixo fincapé en que Overture non ten a intención de substituír ou bifurcar OpenStreetMap. Ven o traballo como complementario. As empresas individuais esperan seguir traballando directamente con OpenStreetMap, e incluso poden aumentar a súa participación, incluídas as achegas financeiras. As edicións de mapas adecuadas para OpenStreetMap deberían ir a OpenStreetMap. Este compromiso declarado co traballo e a comunidade de OpenStreetMap tamén suxire que as empresas e a Fundación Linux están a bordo para apoiar financeiramente a OpenStreetMap. Overture uniuse cun pequeno grupo, e a intención é medrare traballar moitos detalles. Agradecen a participación de OpenStreetMap na forma que teña máis sentido.

A comunidade OpenStreetMap ten unha ampla experiencia e coñecemento no traballo coas realidades diversas e complexas dos datos xeográficos e compilalos nun conxunto de datos global unificado. Este coñecemento pode ser apoiado pero non substituído por enfoques automatizados. Cremos firmemente que o noso enfoque de recollida de datos impulsado pola comunidade seguirá a ser fundamental para calquera mapa global. A misión da Fundación OpenStreetMap (OSMF) de apoiar o crecemento e desenvolvemento da comunidade OSM é máis importante ca nunca.

Animamos a Overture a relacionarse coa Fundación e a comunidade OpenStreetMap, e facernos parte da discusión estratéxica de Overture de forma holística. A través dun bo compromiso, podemos identificar áreas para colaborar e aportar melloras ao núcleo de OpenStreetMap, en lugar de crear esforzos duplicados ou competidores. Os recursos que os fundadores de Overture están a investir no proxecto, e o seu compromiso declarado co traballo e a comunidade de OpenStreetMap, amosan o valor que dan aos bos mapas e o potencial para apoiar melloras nas áreas fundamentais da misión de OpenStreetMap. Damos a benvida a Overture para discutir co Consello da OSMF e explorar as mellores formas de facilitar a comunicación continua, a toma de decisións, a colaboración e o apoio.

Próxima parada do servizo por mantemento o 22-01-2023

Estimadas cartógrafas e usuarias, estimados cartógrafos e usuarios:

O domingo 22 de xaneiro de 2023 entre as 10:00 e as 15:00 UTC/GMT, os servidores de bases de datos da API non estarán dispoñibles por mantemento. Podes velo no teu fuso horario local en Seguimento do evento – Mantemento da API de OpenStreetMap 1

Estamos a planear actualizar o software que executa a base de datos principal de OpenStreetMap. Desafortunadamente, non podemos facelo sen estar un chisco desconectados.

Estarán afectados os seguintes servizos:

  • O sitio web www.openstreetmap.org NON permitirá edicións,
  • A API non permitirá editar mapas (usando iD, JOSM etc.) e
  • as actualizacións de replicación estarán en pausa (as actualizacións por minutos e a replicación de conxuntos de cambios).

Agardamos que a actualización da base de datos non teña toda a duración e tentaremos, na medida do posible, manter a API dispoñible en modo de só lectura, pero é posible que a API non estea dispoñible brevemente.

Ás veces pode que non poida iniciar sesión en servizos que requiren autenticación de openstreetmap.org (por exemplo, na comunidade, no foro ou na axuda).

Outros servizos proporcionados por OpenStreetMap non deberían verse afectados. Agás o inicio de sesión, espérase que todos os seguintes funcionen normalmente:

Os servizos non executados pola Fundación OpenStreetMap non se verán afectados, agás as actualizacións de OSM.

Os detalles técnicos están na base de datos de Plan de actualización da API de PostgreSQL · Número 548 · openstreetmap/operations · GitHub

Paul Norman

Que é OpenStreetMap?

OpenStreetMap foi fundada en 2004 e é un proxecto internacional para crear un mapa do mundo gratuíto. Para iso, nós, miles de persoas voluntarias, recompilamos datos sobre estradas, vías férreas, ríos, bosques, edificios e moito máis en todo o mundo. Todos os nosos datos de mapas poden ser descargados de balde e usados para calquera propósito, incluído o uso comercial. É posible elaborar os seus propios mapas que destaquen determinadas características, calcular rutas etc. OpenStreetMap úsase cada vez máis cando se necesitan mapas que se poden actualizar rápida ou facilmente.

Que é a Fundación OpenStreetMap?

A Fundación OpenStreetMap é unha organización sen ánimo de lucro, creada para apoiar o proxecto OpenStreetMap. Adícase a fomentar o crecemento, o desenvolvemento e a distribución de datos xeoespaciais de balde para que calquera poida empregalos e compartilos. A Fundación OpenStreetMap posúe e mantén a infraestrutura do proxecto OpenStreetMap, recibe o apoio financeiro das cotas de socio e das doazóns e organiza a conferencia internacional anual sobre o Estado do mapa . A Fundación OpenStreetMap apoia o proxecto OpenStreetMap a través do traballo dos nosos grupos de traballo voluntarios. Considera facerte persoa membro da Fundación: podes facelo de balde se es un colaborador activo de OpenStreetMap.

Presentamos a lapela Comunidades en OSM.org

Hai unha nova forma de atopar as comunidades de OSM e conectar con elas.

Na esquina superior dereita de OSM.org agora podes ver unha pestana “Comunidades” que enlaza a un espazo único e centralizada que enumera as seccións locais formalmente constituídas, así como moitas outras comunidades de OSM. Tendo en conta o número de comunidades que hai e o rápido que está a medrar OSM, é un bo momento para engadir unha forma destacada de conectarse.

Segundo o membro de Grupo de traballo de seccións locais e comunidade Joost Schouppe, a nova pestana “probablemente sexa o cambio máis visible en osm.org desde a adición de Notas”.

Unha vez que navegas ata a nova páxina de Comunidades, verás listadas as seccións locais que se envían de forma dinámica a través do índice de comunidades de OSM. De feito, o aspecto máis difícil do proxecto foi descubrir como integrar na páxina os datos do índice de comunidades de OSM (OCI, polas súas siglas en inglés) en lugar de engadir unha simple lista de seccións locais como contido estático. Como sinalou o mantedor do sitio web Andy Allan: “O último tería sido rápido e sinxelo, pero usar o OCI significa que se actualiza automaticamente cando se engaden novos capítulos, e tamén significa que estamos a reutilizar todas as traducións para os nomes das seccións locais nas 46 diferentes linguas que xa apoiamos”.   

Aínda que actualmente non hai unha forma de capturar dinámicamente todas as outras comunidades menos formalizadas, a adición da sección “Outros grupos” destaca a súa existencia e indica o camiño para obter máis información.  

“É só un comezo”, di o membro do grupo de traballo de comunidade Adam Hoyle, quen tamén traballou no proxecto.  “O ideal é que isto poida converterse nunha páxina centralizada aínda mellor para que as persoas e as comunidades se atopen entre si”. 

Mostrar unha lista de seccións locais só é rascar a superficie do que se pode facer, agora que se resolveron os diversos desafíos técnicos subxacentes. Por exemplo, cando os novos cartógrafos e cartógrafas establezan a localización do seu fogar no perfil, poderían mostrarse inmediatamente unha lista de foros locais, grupos de cartografía e canles de comunicación personalizadas para a súa localización no seu panel persoal. 

A clave para enviar melloras adicionais á páxina “Comunidades” é contar con voluntariado para axudar. “Toda esta información da comunidade xa está no índice de comunidades de OSM, polo que agora necesitamos persoas que axuden a ampliar a nosa integración”, di Allan. Schouppe engade que “este asunto en particular está na axenda do grupo de traballo de comunidades locais desde outubro de 2020 e Adam comezou a traballar nel en xaneiro de 2021. Isto demostra que, como todos somos persoas voluntarias, leva moito tempo e esforzo evolucionar osm.org, pero pódese facer”.

→ Para contribuír ao desenvolvemento de OSM.org, podes visitaro Github principal e/ou esta entrada, que destaca as moitas solicitudes de extracción existentes e dá ideas sobre como contribuír.

→ Para axudar ao grupo de traballo nos seus esforzos para axudar ás comunidades locais a medrar, únete a unha das súas canles.

 Gustaríame agradecer a Adam Hoyle polo seu traballo e paciencia mentres traballabamos  mediante a posta en marcha das bases técnicas, que levou un tempo pero que nos preparan para o futuro; e tamén ao equipo que está detrás de índice de comunidades que fixo algúns cambios no seu lado das cousas para axudarnos a conseguir as traducións  totalmente funcionando con máis facilidade. –-Andy Allan

The OpenStreetMap Foundation is a not-for-profit organisation, formed to support the OpenStreetMap Project. It is dedicated to encouraging the growth, development and distribution of free geospatial data for anyone to use and share. The OpenStreetMap Foundation owns and maintains the infrastructure of the OpenStreetMap project, is financially supported by membership fees and donations, and organises the annual, international State of the Map conference. Our volunteer Working Groups and small core staff work to support the OpenStreetMap project. Join the OpenStreetMap Foundation for just £15 a year or for free if you are an active OpenStreetMap contributor.

Feliz 18º aniversario, OpenStreetMap :)

Torta polo 18º aniversario de OpenStreetMap, celebrado por OSM Bangladesh na BSMRSTU (Universidade de Ciencia e Tecnoloxía de Bangabandhu Sheikh Mujibur Rahman). Foto de Sawan Shariar, CC-BY-SA 4.0

Este domingo, 7 de agosto de 2022,
celebramos os 18 anos de OpenStreetMap!

As celebracións comezaron a semana pasada e aínda continuarán unha semana máis. Así que, como pensas celebralo? 🙂

Estás pensando en organizar un evento en liña ou presencial? Engade o teu evento á wiki de OSM! E se a edición da wiki non é o teu, envía un correo electrónico a communication@osmfoundation.org cos detalles do teu evento e engadirémolo 🙂

Fas unha torta de aniversario? Podes ver exemplos anteriores de tortas para inspirarte. Non esquezas a atribución!

Podes publicar por que te gusta OpenStreetMap 🙂 Lembra usar o hashtag #OpenStreetMap18 nas redes sociais.

Queres publicar fotos das celebracións? Se as túas fotos van acompañadas do texto “CC-BY-SA 4.0” (ou outra licenza aberta), podemos engadilas á wiki de OSM (ou non dubides en engadilas por ti mesmo! ~ rexistrarte aquí ).

Ou podes publicar unha foto túa cunha mensaxe 🙂

Estás organizando unha festa en liña ou un mapatón?

Podes usar o servidor de vídeo BigBlueButton da FundaciónOpenStreetMap. Para obter unha conta gratuíta e a túa propia sala de vídeo, rexístrate .

  • Podes usar a túa sala de vídeo incluso despois do aniversario, para calquera evento relacionado con OSM.
  • As persoas membros da comunidade en localizacións con banda larga reducida poden beneficiarse de usar a configuración para redes con baixos recursos de BigBlueButton.
  • Engade o teu evento á wiki de OSM! Se a edición da wiki non é o teu, envía un correo electrónico a communication@osmfoundation.org cos detalles do teu evento e engadirémolo 🙂

Únete a nós!

A conmemoración do aniversario da creación de OpenStreetMap celébrase o 9 de agosto ou preto do 9 de agosto, que é o aniversario do rexistro do nome de dominio OpenStreetMap.org. O concepto de OpenStreetMap é anterior ao rexistro do nome de dominio, pero parece unha boa data de aniversario 🙂

Para todo o mundo: feliz día! 🙂

Recibe notificacións sobre novas publicacións de blog: Subscríbete á fonte RSS!

Queres traducir esta e outras publicacións de blog noutro idioma? Envía un correo electrónico a communication@osmfoundation.org co asunto: Helping with translations in [language]

OpenStreetMap foi fundado en 2004 e é un proxecto internacional para crear un mapa do mundo gratuíto. Para iso, nós, miles de persoas voluntarias, recompilamos datos sobre estradas, vías férreas, ríos, bosques, edificios e moito máis en todo o mundo. Todos os nosos datos de mapas poden ser descargados de balde e usados para calquera propósito, incluído o uso comercial. É posible elaborar os seus propios mapas que destaquen determinadas características, calcular rutas etc. OpenStreetMap úsase cada vez máis cando se necesitan mapas que se poidan actualizar moi rápido ou facilmente.

Anuncio de entradas e programación do SotM 2022

Petar Milošević, CC BY-SA 4.0, via Wikimedia Commons

O Grupo de traballo do State of the Map comprácese de anunciar que as entradas e a programación xa están dispoñíbeis no sitio web do SotM 2022: https://2022.stateofthemap.org/programme/

Entradas
Os colaboradores e entusiastas do OSM xa poden mercar as entradas para asistir á conferencia do SotM de xeito presencial ou en liña, a través de https://2022.stateofthemap.org/tickets/

Hai dous xeitos diferentes de asistir este ano:

Entrada para Florencia
Este é a entrada para asistir á conferencia de xeito presencial en Florencia. Esta entrada inclúe comidas nos descansos da conferencia e eventos sociais. Se estás contribuíndo ao OpenStreetMap coma aficionado, podes escoller a Entrada da Comunidade con desconto. Do contrario, escolle unha entrada normal.

Entrada virtual
Esta é a entrada para asistir á conferencia de xeito online. Isto dará acceso ás xuntanzas da conferencia e a un chat para interactuar con outros participantes e permitirá enviar preguntas aos oradores durante as sesións de preguntas e respostas.

Entrada de reserva anticipada
Ofrecemos entradas de reserva anticipada a un prezo con desconto até o 1 de xullo do 2022 ás 23:59 UTC. O prezo normal da entrada aplicarase após esa data.

Programación (Sesións Xerais)
Agradecemos a todos os que enviaron a súa proposta para falar e organizar unha sesión no SotM 2022! Recibimos moitas propostas incríbeis e estamos encantados de compartir a primeira versión do noso programa de Sesións Xerais, agora accesíbel a través de https://2022.stateofthemap.org/programme/

Forneceremos actualizacións continuas sobre o programa (incluído o Programa de Sesións académicas).

Estade atentos para máis actualizacións sobre o State of the Map 2022!
Para calquera consulta, non dubides en porte en contacto connosco ensotm [at] openstreetmap.org ou únete á canle do Telegram para interactuar con outros asistentes á conferencia do SotM en https://t [dot] me/sotm2018

Vémonos en Florencia e online!
O Grupo de traballo do State of the Map

Queres traducir esta e outras publicacións do blogue á túa lingua…?   Envía un correo electrónico a communication@osmfoundation.org co asunto:   Axuda coas traducións en [lingua].

A conferencia State of the Map é a conferencia internacional anual do OpenStreetMap, organizada pola Fundación OpenStreetMap A Fundación OpenStreetMap é unha organización sen fins de lucro, formada no Reino Unido para apoiar o Proxecto OpenStreetMap. Adícase a fomentar o crecemento, o desenvolvemento e a distribución de datos xeoespaciais de balde para que calquera poida empregalos e compartilos. A Fundación OpenStreetMap posúe e mantén a infraestrutura do proxecto OpenStreetMap, e podes apoiala facéndote membro. O Comité Organizador do State of the Map é un dos nosos Grupos de Traballo voluntarios.

OpenStreetMap fundouse no 2004 e é un proxecto internacional para crear un mapa libre do mundo. Para facelo, nós, milleiros de voluntarios, recompilamos datos sobre estradas, ferrocarrís, ríos, bosques, edificios e moito máis en todo o mundo.  Todos poden baixar os nosos datos de mapas de balde e empregalos para calquera propósito, incluído o uso comercial. É posible producir os teus propios mapas que resalten certos elementos, calcular rutas, etc.  O OpenStreetMap emprégase cada vez máis cando se precisan mapas que se poden actualizar moi rápida ou doadamente.