Esta fin de semana, aproveita para ler as respostas e os manifestos das persoas candidatas e votar nas eleccións de 2024 ó Consello da Fundación OSM!

Os correos electrónicos de votación de OpaVote enviaranse ós membros da Fundación OSM elixibles este sábado 12 de outubro de 2024, despois das 16:00 UTC, e ligarán directamente á páxina de votación, listando cada candidatura en orde aleatoria permitindo clasificalas por orde de preferencia.

Elixibilidade para votar

Podes votar nas eleccións se

• fuches persoa socia durante os 90 días completos anteriores á data da Asemblea Xeral Anual (que terá lugar o 19 de outubro de 2024), e
• a túa adhesión non está en mora 7 días antes da data da Asemblea Xeral Anual, e
• es unha persoa física.

Correo electrónico de OpaVote

O correo electrónico da plataforma de votación en liña OpaVote enviarase ó enderezo de correo electrónico asociado á túa adhesión á Fundación OSM e

• o asunto do correo electrónico será: [OpenStreetMap Foundation] Vote for 2024 Board Elections [some_random_letters]. Traducido ó galego: [Fundación OpenStreetMap] Vota para as eleccións da Xunta de 2024 [algunhas_letras_ó_chou],
• o remitente será: noreply@opavote.com

Se cres que deberías ter recibido un correo electrónico de votación pero non o atopas antes do domingo 13 de outubro, consulta o teu cartafol de spam. Se aínda falta, envía unha mensaxe ó enderezo de correo electrónico mencionado aquí.

Información de votación e respostas a preguntas frecuentes

Podes atopar máis información sobre a votación e respostas ás preguntas máis frecuentes nesta páxina.

Asegúrate de ler o aviso da páxina antes de votar.

Data límite para votar: sábado 19 de outubro ás 16.00h UTC

As urnas permanecerán accesibles durante unha semana, pechando o sábado 19 de outubro de 2024 ás 16.00h UTC, cando comezará a Asemblea Xeral Anual. Pedimos que voten con antelación.

---

Queres traducir esta e outras publicacións do blog a outra lingua? Envía un correo electrónico a  communication@osmfoundation.org  con asunto: Axuda coas traducións en [your language]

A Fundación OpenStreetMap é unha organización sen ánimo de lucro, creada para apoiar o proxecto OpenStreetMap. Dedícase a fomentar o crecemento, desenvolvemento e distribución de datos xeoespaciais gratuítos para que calquera poida usar e compartir. A Fundación OpenStreetMap posúe e mantén a infraestrutura do proxecto OpenStreetMap, recibe o apoio financeiro das cotas de persoas asociadas e das doazóns e organiza a conferencia internacional anual sobre o Estado do mapa . Os nosos grupos de traballo voluntarios e o pequeno persoal central traballan para apoiar o proxecto OpenStreetMap. Únete á Fundación OpenStreetMap por só 15 € ó ano ou de balde se colaboradoras activamente de OpenStreetMap.

Recibe notificacións sobre novas publicacións do blog: subscríbete ó feed RSS en inglés (as fontes tamén están dispoñibles para outros idiomas)

A publicación orixinal en inglés foi escrita por Dorothea.

Como parte do noso traballo durante os últimos tres meses, o Consello da Fundación OSM estivo revisando o Plan Estratéxico da OSMF. Agora compartimos unha versión reescrita para recibir comentarios dos e das membros de OSMF e da comunidade OSM.

Podes atopar a última versión aquí.  Engade as túas ideas e achegas a través do Foro da Comunidade ou na lista de correo. 

Destacados: 

As roldas de comentarios sobre versións anteriores do Plan foron moi útiles para definir onde estamos agora. Verás moitos cambios no documento.  

• O Plan comeza cun preámbulo que ofrece unha visión xeral de onde estamos agora e cara a onde temos intención de ir.

• O Plan conserva os catro piares arredor dos que o Consello da OSMF organiza o seu traballo: infraestrutura técnica, desenvolvemento comunitario, desenvolvemento institucional e goberno financeiro. 

• Dentro destes, hai un conxunto de obxectivos e algunhas mencións a grandes accións. O máis importante é que hai unha indicación de que parte da OSMF é responsable de desenvolver e levar a cabo as accións.

• En xeral, o Plan é máis conciso e, pensamos, máis claro, proporcionando unha base sólida para comprender o traballo da OSMF.

Que segue? 

Revisaremos os comentarios de forma continua durante as próximas tres semanas, seguido dun debate do Consello por chat a mediados do mes de setembro. Despois faremos revisións adicionais baseadas nos comentarios coa ambición de aprobar o Plan na reunión do Consello do 21 de setembro de 2023.

Agardamos saber de ti e grazas a quen participou neste proceso!

---

A Fundación OpenStreetMap é unha organización sen ánimo de lucro, creada para apoiar o proxecto OpenStreetMap. Dedícase a fomentar o crecemento, desenvolvemento e distribución de datos xeoespaciais gratuítos para que calquera poida usar e compartir. A Fundación OpenStreetMap posúe e mantén a infraestrutura do proxecto OpenStreetMap, recibe o apoio financeiro das cotas de persoas asociadas e das doazóns e organiza a conferencia internacional anual sobre o Estado do mapa . Os nosos grupos de traballo voluntarios e un reducido persoal traballan para apoiar o proxecto OpenStreetMap. Únete á Fundación OpenStreetMap por só 18 € ó ano ou de balde se colaboras activamente en OpenStreetMap. Podes facer un agasallo para apoiar o traballo de OpenStreetMap en supporting.openstreetmap.org

A publicación orixinal en inglés foi escrita por Courtney Williamson.

En xaneiro, a nova directiva da OSMF reuniuse para discutir as actuacións que cada compoñente quere impulsar en 2023. O que xurdiu foi unha axenda inicial de traballo para este ano, cunha boa distribución en todas as áreas. Embaixo amósanse algunhas frases directamente de cada unha das compoñentes sobre o que estamos pensando e como e onde queremos contribuír en 2023.

Agradecemos a vosa aportación e participación. Contacta connosco directamente  ou, se es unha persoa membro da OSMF, únete á reunión mensual do Consello. Seguiremos desenvolvendo e perfeccionando as nosas ideas, e teremos unha reunión virtual proximamente.

Mikel:

A recadación de fondos é a miña principal prioridade, apoiar o noso persoal básico e a infraestrutura de forma sostible. Teremos campañas de recadación de fondos en fontes diversificadas, incluíndo pequenos doadores comunitarios, subvencións públicas e privadas e compromisos do sector corporativo. En segundo lugar, centrareime en facer da OSMF un excelente lugar para traballar, seguir implementando os procesos e as estruturas necesarias e apoiándoos para que teñan éxito. Finalmente, como secretario, quero darlle á OSMF un ton de comunicación profesional e receptivo. Canto máis penso niso, máis creo que a excelente comunicación é a clave para tanto: a través da captación de fondos, a creación de reputación e o crecemento da comunidade.

Sara:

Gustaríame centrar este ano en facer que as operacións diarias da OSMF funcionen con máis fluidez, para que o Consello teña máis tempo no futuro para centrarse en asuntos estratéxicos. Isto inclúe unha planificación e un orzamento anuais, comunicacións sen problemas para e desde o Consello e un plan financeiro onde a maioría dos nosos custos operativos se cubran mediante ingresos regulares. Tamén espero obter algo de sabedoría dos nosos grupos de traballo para entender como podemos axudarnos mutuamente para difundir o traballo de forma máis eficiente e con máis ombros.

Guillaume:

• trasladando o noso rexistro corporativo á UE
• mellorando a comunicación
• facilitar melloras de procesos para o etiquetado OSM, como a democracia líquida
• planificación financeira e orzamento
• aumentar a diversidade de fontes de captación de fondos
• con Grant, incrementar a fiabilidade da infraestrutura

Arnalie:

Durante o meu primeiro ano no consello de Consello da OSMF, gustaríame centrarme en:

• Constituír máis seccións locais
• Diversificar a pertenza da OSMF, incluíndo os grupos de traballo da OSMF
• Garantir a sustentabilidade financeira e a captación de fondos eficaz (un aspecto que do que teño que aprender máis e desenvolver persoalmente)

Roland:

Para min, a recadación de fondos é o máis importante que hai que facer agora mesmo. Necesitamos cartos tanto para as melloras tan esperadas como para as operacións diarias, e as nosas fontes tradicionais de ingresos dos membros individuais e corporativos nin sequera cobren as nosas operacións diarias. Ao mesmo tempo, o anuncio de Overture deixou claro que algúns consumidores de datos están dispostos a gastar cartos en datos de mapas fiables. Polo tanto, un elemento básico é axustar os niveis de adhesión corporativa.

Outro aspecto é recadar cartos para proxectos de mellora e mesmo proxectos completamente novos. A historia demostrou que é máis factible conseguir ingresos para ideas concretas que para un fondo abstracto. Mentres o Consello traballe en nome da comunidade, escoitarei as aportacións sobre os proxectos existentes e discutiremos as ideas de novos proxectos que sexan o suficientemente concretos para estimar os custos e ter así unha lista de posibilidades para entusiasmar a quen queira doar. Non espero que todos os proxectos sexan financiados, pero si quero ver todas as oportunidades de financiamento potencial atopando un proxecto impactante no que se poida investir.

Craig:

Agora, neste mes, estou a facer algo de forza coas miñas   promesas electorais .

Quero axudar a OSMF a construír a comunidade de cartografía e apoiar e animar aos líderes comunitarios existentes. O meu esforzo especial estará en África.

Estou ansioso por priorizar o programa de diversidade e inclusión da OSMF. Teño algunhas ideas, pero isto hai que facelo como un esforzo colectivo.

En materia de tecnoloxía, gustaríame apoiar a OSMF para documentar as súas operacións informáticas, actualizar e mellorar o software, ver as estruturas de datos, promover mosaicos de mapas vectoriais e manter o hardware actualizado e fiable.

Tamén estou a facer un esforzo para apoiar a administración dun xeito profesional, centrado na planificación estratéxica, o orzamento, a captación de fondos e as comunicacións.

Mateusz:

Para comezar, é necesario manter as cousas básicas funcionando. Isto aplica á comunidade OSM, aos servidores e ao software crítico. Temos a esperanza en que nestes ámbitos só fagan falta actividades rutineiras.

Estou a traballar nun resumo orzamentario lexible por humanos, necesario para o traballo do Consello de OSMF, unha mellor transparencia e para as persoas interesadas no que realmente está a facer a OSMF, especialmente quen potencialmente poida doar.

O manexo do RXPD está atrapado no limbo e é responsabilidade do Consello de OSMF organizar o manexo desta molesta tarefa.

Por último, quero tomar medidas para facer cumprir os requisitos de atribución.

En decembro de 2022, catro novas persoas foron elixidas para o Consello da Fundación OpenStreetMap, que complementan as tres que xa prestaban servizo. Estas persoas son Arnalie Vicario, Craig Allan, Mateusz Konieczny e Sarah Hoffmann e únense a Guillaume Rischard, Mikel Maron e Roland Olbricht.

No que respecta ás ambicións de diversidade da OSMF, este colectivo de membros da Xunta é ilusionante por dúas razóns: En primeiro lugar, porque esta é só a segunda vez que o Consello da OSMF conta con múltiples membros femininos e, en segundo lugar, porque esta é a xunta con máis diversidade xeográfica que vimos ao ter representación de catro continentes.

Entón, imos coñecer o Consello de 2023:

Arnalie Vicario (Filipinas)

Arnalie é de Filipinas e cartografa baixo o nome de usuario arnalielsewhere. Defende os datos abertos e é unha apaixonada da construción de espazos inclusivos na comunidade da cartografía aberta. Foi especialista en SIX durante sete anos ata que asumiu o compromiso comunitario (en liña) en 2020. Traballa como responsable de participación na comunidade en liña no Equipo humanitario de OpenStreetMap (HOT, polas súas siglas en inglés) e como nai a tempo completo.

É colaboradora de OpenStreetMap desde 2016, o mesmo ano en que se uniu e pasou a formar parte da comunidade OSM en Filipinas. En 2018, coñeceu á súa parella na conferencia do Estado do Mapa de Milán e volveu reunir o grupo GeoLadies Philippines, unha agrupación de defensa da diversidade comunitaria, a participación colaborativa e os espazos afirmativos, especialmente para mulleres, xunto con outras comunidades pouco representadas en OpenStreetMap. É partidaria e aliada de varias comunidades e redes como Geochicas, Women+ in Geo, Open Heroines e moitas máis.

Podes obter máis información das súas opinións sobre a comunidade en OpenStreeMap e sobre a cartografía aberta humanitaria na Entrevista de podcast de Geomob – Arnalie Vicario: Construíndo espazos inclusivos en OSM, así como a través dos seus diarios OSM.

Craig Allan (Sudáfrica)

Craig procede dun goberno local onde, como planificador espacial, recibiu formación formal en interpretación de fotografías aéreas, fotogrametría e topografía. Utilizou sistemas SIX comerciais desde os anos 80. Comezou polo sinxelo pero moi efectivo Atlas GIS de Strategic Mapping Inc. e pasou máis tarde ao exasperante pero eficaz ARC/INFO de ESRI. Agora é un fan de QGIS e utilízao para apoiar o traballo filantrópico na Rangpur Division de Bangladesh.

Craig céntrase na cartografía en África baixo o nome de usuario cRaIgalLAn. Aprecia poñer unha aldea no mapa xa que isto pode permitir que se coñezan as persoas que alí viven e así reciban apoio ao desenvolvemento e axuda humanitaria. Craig tamén está moi interesado na conservación e no cambio climático, así que fai moita cartografía de bosques ameazados na República Democrática do Congo e de varios lugares de Kenia, incluíndo a reserva de Mara e os bosques e zonas húmidas do interior da cidade de Lamu. Tamén realiza mapas no norte de Chad porque lle interesan tanto os arcos rochosos como os bosques xéricos montanos do Sáhara Oriental que, dalgún xeito, sobreviven nas altas montañas do Sáhara.

Na súa vida laboral posterior, fixo menos xeografía e demografía e máis xestión, incluíndo planificación estratéxica, xestión de riscos, xestión do rendemento, orzamentos e tarefas administrativas. Estas habilidades e experiencias para construír e xestionar organizacións agora emprégaas no interese da Fundación OSM e para crear unha comunidade OSM máis ampla.

Guillaume Rischard (Luxemburgo)

Guillaume Rischard é de Luxemburgo e mapea como Stereo, que é máis fácil de pronunciar (tamén é o seu nome de usuario no wiki). Cando descubriu OpenStreetMap en 2008, só se amosaban algunhas estradas principais ao seu redor. Non tomou o proxecto en serio. En 2011, topouse de novo con nós e viu que o mapa se fixera moito máis preciso. Detectou un nome que faltaba, e cando o viu no mapa cando se actualizou xusto despois de gardalo, quedou enganchado. Cando carga un conxunto de cambios, gústalle abrir ese lugar no seu navegador mentres aínda non se renderiza, e a mesma URL nunha nova pestana uns segundos despois e cambiar entre elas.

Traballa como consultor de datos autónomo e foi o responsable técnico que axudou a impulsar a estratexia do Portal de datos abertos de Luxemburgo, onde conseguiu que se publicaran os enderezos, as ortoimaxes e os datos de mapas oficiais de Luxemburgo.

O máis significativo que escribiu recentemente é o informe do Grupo de traballo de membros sobre as 100 inscricións sospeitosas. Guillaume e o coautor Steve Friedl tiveron oa honra de recibir o premio OpenStreetMap pola súa influencia na conferencia do Estado do Mapa en Heidelberg.

É membro do Grupo de traballo de datos, do Grupo de traballo de membros e ocasionalmente colabora co Semanal OSM .

Mateusz Konieczny (Polonia)

Mateusz cartografa e edita a wiki co seu propio nome. Centra o seu mapeo na topografía local, pero tamén fixo algunhas edicións de bots e edicións remotas. Tamén contribuíu a StreetComplete e outras ferramentas relacionadas con OSM, como os presets de iD e JOSM. Concéntrase moito tempo en contribuír ao wiki de OpenStreetMap, especialmente en documentar esquemas de etiquetado e revisar os ficheiros cargados para asegurarse de que teñen a información de dereitos de copia correctamente engadida.

Mateusz quere contribuír a unha maior transparencia, atribución e cumprimento do RXPD mentres estea no Consello.

Mikel Maron (EUA)

Mikel Maron é un programador e xeógrafo que traballa no usos de impacto comunitario e humanitario do código e os datos abertos. Comezou con OSM en 2005. Foi elixido para o Consello da OSMF en 2015, e anteriormente tamén de 2007 a 2012. Actualmente traballa en The Earth Genome, como xefe de produtos dixitais. No pasado dirixiu o equipo da comunidade en Mapbox. É cofundador do Grupo humanitario de OpenStreetMap, da GroundTruth Initiative e do proxecto Map Kibera . Viaxou moito, organizando proxectos de cartografía na India, Palestina, Exipto, Suazilandia, entre outros.

Mapea baixo mikelmaron e contribúe ao wiki baixo Mikel .

Roland Olbricht (Alemaña)

Roland Olbricht chegou a OSM en 2008. Desde 2011 mantén e opera a API Overpass independentemente do seu traballo diario. Antes da Covid participou en varias reunións locais en Alemaña. Colabora no wiki de OSM co nome de usuario Roland.olbricht .

Na súa vida profesional, Roland fai software para o transporte público como desenvolvedor de software para a empresa MENTZ GmbH .

Sarah Hoffmann (Alemaña)

Sarah Hoffmann leva contribuíndo a OpenStreetMap desde 2008 co nome de usuario lonvia (e colabora no wiki co mesmo nome).

Comezou como unha simple mapeadora, recollendo moitos datos mentres facía sendeirismo polos Alpes suízos. Co paso dos anos involucrouse cada vez máis no desenvolvemento de software para OSM. É mantedora de Nominatim , osm2pgsql , waymarkedtrails.org e outros dous proxectos. Forma parte do equipo de administración do sistema da OSMF, onde é responsable dos servidores de Nominatim e axuda no comité de programas do Estado do Mapa os últimos dous anos.

En 2020 finalmente renunciou a finxir que OSM é só un pasatempo. Actualmente traballa como freelance facendo desenvolvemento e consultoría de software OSM en xeral e de Nominatim en particular. Vive en Dresden , Alemaña.

---

A Fundación OpenStreetMap é unha organización sen ánimo de lucro, creada para apoiar o proxecto OpenStreetMap. Dedícase a fomentar o crecemento, desenvolvemento e distribución de datos xeoespaciais gratuítos para que calquera poida usar e compartir. A Fundación OpenStreetMap posúe e mantén a infraestrutura do proxecto OpenStreetMap, recibe o apoio financeiro das cotas de persoas asociadas e das doazóns e organiza a conferencia internacional anual sobre o Estado do mapa . Os nosos grupos de traballo voluntarios e un reducido persoal traballan para apoiar o proxecto OpenStreetMap. Únete á Fundación OpenStreetMap por só 18 € ao ano ou de balde se colaboras activamente en OpenStreetMap.