A xunta da Fundación OpenStreetMap está encantada de anunciar que Meta fixo unha importante contribución de 178.710 euros para apoiar a comunidade e a infraestrutura principal de OpenStreetMap. Este financiamento fundamental está dirixido ás operacións e infraestruturas de OSM e axuda a unir á comunidade OSM en todo o mundo.
A maior parte destes fondos destinarase a satisfacer a crecente demanda de persoas usuarias e datos, a mellorar a nosa infraestrutura técnica e ao desenvolvemento de software. Unha parte dos fondos xa se despregou para patrocinar o Estado do Mapa en Nairobi e máis de media ducia de eventos rexionais e locais de OSM en todo o mundo. Meta pasa a ser membro corporativo Platinum, un compromiso con OSM nos próximos anos.
Meta contribúe e participa en OSM de diversas maneiras. Os seus editores concentráronse especialmente na detección e corrección de erros e actos vandálicos. Meta desenvolve o editor Rapid para permitir a creación de cartografía asistida por intelixencia artificial. A plataforma Mapillary de Meta recolleu e puxo a disposición imaxes a nivel de rúa para OSM durante anos, un recurso oim valioso para mapear. Recentemente, Meta centrouse nos mapas peonís, involucrando á comunidade OSM para mellorar os datos como as beirarrúas e os pasos de peóns.
A xunta da OSMF agradece a doazón de Meta e as moitas contribucións a OpenStreetMap.
O OSMF acolle o apoio en especie, así como o apoio financeiro para o desenvolvemento técnico, as operacións e a comunidade de OSM:
- Aprende sobre os beneficios dunha subscrición corporativa a OSMF
- Aprende por que facer un agasallo financeiro a OpenStreetMap axuda a miles de persoas, proxectos e comunidades en todo o mundo
A Fundación OpenStreetMap é unha organización sen ánimo de lucro, creada para apoiar o proxecto OpenStreetMap. Adícase a fomentar o crecemento, o desenvolvemento e a distribución de datos xeoespaciais de balde para que calquera poida empregalos e compartilos. A OpenStreetMap Foundation posúe e mantén a infraestrutura do proxecto OpenStreetMap, é apoiada financeiramente polas cotas das persoas asociadas e das doazóns e organiza a conferencia internacional anual do Estado do mapa. Os nosos grupos de traballo voluntarios e un persoal moi reducido son o soporte principal para o proxecto OpenStreetMap. Únete á Fundación OpenStreetMap por só 18 € ao ano ou de balde se colaboradoras activamente de OpenStreetMap.
A publicación orixinal en inglés foi escrita por Mikel.
This post is also available in: Inglés Francés Español Grego Coreano
